نئی دہلی: بھارتی سخت اقدامات کے جواب میں پاکستان کی جانب سے بھارت کے لیے فضائی حدود بند کرنے کے بعد بھارتی ایئر لائنز بحران سے دوچار۔
بھارتی نائب صدر کی خصوصی پرواز کو نئی دہلی سے اٹلی جاتے ہوئے تاخیر کا سامنا کرنا پڑا اور بھارتی نائب صدر کی پرواز نے ڈیڑھ گھنٹہ طویل فاصلہ اختیار کیا۔
ٹورنٹو، نیویارک، لندن، ڈنمارک اور دمام سے دہلی کی پروازوں میں 2 گھنٹے اضافی لگے جب کہ برمنگھم، سان فرانسسکو، فرینکفرٹ اور پیرس سے دہلی کی پروازوں کو 2 گھنٹے انتظار کرنا پڑا۔
ایمسٹرڈیم اورآذربائیجان کے شہر باکو سے دہلی کی پرواز میں 2 گھنٹے تاخیر ہوئی، طویل دورانیے کی بین الاقوامی پروازوں کو کئی دیگر ملکوں کے ائیرپورٹس پر اتارنا پڑا، شارجہ امرتسر پرواز کو احمدآباد اور ٹورنٹو دہلی کی ایئر انڈیا کی پرواز کو ڈنمارک اتارا گیا۔
ابوظبی اتاری گئی پیرس اور لندن کی پروازیں ری فیولنگ کے بعد نئی دہلی پہنچیں جب کہ دہلی سے تبلیسی کے لیے روانہ ہوئی پرواز احمد آباد اتاری گئی۔
الماتے اور تاشقند کے لیے 2 پروازیں منسوخ کردی گئیں اور دبئی امرتسر کی پرواز ڈھائی گھنٹے تاخیر سے روانہ ہوئی۔