نئی دہلی: بھارت کی ریاست گجرات میں دو روز سے گرج چمک کے ساتھ بارش جاری ہے، طوفان اور کچھ علاقوں میں ژالہ باری کا سلسلہ بھی ہے۔ ان واقعات میں 24 افراد ہلاک اور درجنوں زخمی ہوچکے ہیں۔
بھارتی میڈیا کے مطابق ریاست گجرات میں 24 گھنٹوں میں 144 ملی میٹر بارش ریکارڈ کی گئی۔ طوفانی بارشوں نے کئی مکانات کو تباہ کردیا جب کہ مال مویشی کو بھی نقصان پہنچا۔
آج دوپہر کے بعد سے بارشوں کا سلسلہ تھم گیا ہے لیکن بھارتی محکمۂ موسمیات نے گجرات کے کچھ علاقوں میں بارشوں کا سلسلہ جاری رہنے کی پیش گوئی کی ہے۔
آسمانی بجلی گرنے کے واقعات زیادہ تر کھیتوں اور میدانی علاقوں میں پیش آئے۔ ان علاقوں میں بارشوں کے دوران آسمانی بجلی گرنے کے واقعات عام ہیں تاہم پہلی بار اتنی ہلاکتیں ہوئی ہیں۔
ریاستی حکومت نے آسمانی بجلی گرنے کے واقعات میں جانی اور مالی نقصان کا اندازہ لگانے کے لیے سروے کمیٹی تشکیل دے دی ہے، جس کی بنائی گئی رپورٹ کی بنیاد پر متاثرین کی مالی مدد کی جائے گی۔
خیال رہے کہ گجرات میں اگست 2020 میں موسلا دھار بارش اور سیلاب سے 14 افراد جب کہ اگست 2019 میں 31 افراد ہلاک ہوگئے تھے۔ ان دونوں واقعات میں آسمانی بجلی سے ہلاک ہونے والے بھی شامل تھے۔
