اسلام آباد: امریکی صدر ڈونلڈ ٹرمپ کے دورۂ پاکستان کی خبروں پر ترجمان دفتر خارجہ نے لاعلمی کا اظہار کیا ہے۔
ترجمان دفتر خارجہ شفقت علی خان نے بین الاقوامی خبر رساں ادارے سے گفتگو میں امریکی صدر ڈونلڈ ٹرمپ کے دورۂ پاکستان سے متعلق لاعلمی کا اظہار کیا۔
اس سے قبل یہ خبر سامنے آئی تھی کہ امریکی صدر ٹرمپ 18 ستمبر کو پاکستان کے دورے پر اسلام آباد پہنچیں گے، اس دوران وہ پاکستان کی سیاسی و عسکری قیادت سے ملاقاتیں کریں گے۔
دوسری جانب پاکستان میں امریکی سفارت خانے کے ترجمان نے برطانوی خبر رساں ایجنسی سے گفتگو میں کہا کہ صدر ٹرمپ کے شیڈول سے متعلق وائٹ ہاؤس تصدیق فراہم کرسکتا ہے، ہمارے پاس اس متعلق اعلان کرنے کے لیے کچھ نہیں ہے۔
خبرایجنسی کے مطابق پاکستانی وزارت اطلاعات نے اس متعلق کوئی تبصرہ نہیں کیا ہے۔
