کراچی: معروف سوشل میڈیا انفلوئنسر پیاری مریم دوران زچگی جان کی بازی ہارگئیں، اُن کے جڑواں بچوں کو بھی نہیں بچایا جاسکا۔
نرم گفتار اور دلکش کونٹینٹ کی بدولت لاکھوں دلوں پر حکمرانی کرنے والی معروف انفلوئنسر پیاری مریم کا اچانک انتقال ہوگیا۔
پیاری مریم کے انتقال کی خبر ان کے انسٹاگرام اکاؤنٹ پر دی گئی، جس نے ان کے مداحوں کو غم زدہ کردیا۔
پیاری مریم اپنے شوہر احسن علی کے ساتھ خوش گوار زندگی گزار رہی تھیں اور وہ جڑواں بچوں کی ماں بننے والی تھیں۔
اچانک طبیعت خراب ہونے پر مریم کو اسپتال لے جایا گیا جہاں وہ دوران زچگی انتقال کرگئیں۔ بدقسمتی سے ان کے بچوں کو بھی نہ بچایا جاسکا۔
ایک مقامی صحافی نے مریم کے اہل خانہ سے بات کی ہے جس میں لواحقین نے تصدیق کی کہ مریم اور ان کے بچوں کا انتقال ہوچکا ہے اور وہ اس وقت شدید غم میں ہیں، اس لیے وہ کسی سے بات کرنے کی حالت میں نہیں ہیں۔
