راولپنڈی: انگلش ٹیم کے کپتان بین اسٹوکس نے پاکستان کے سیلاب زدگان کے لیے بڑا اعلان کردیا۔
انگلینڈ کے ٹیسٹ کپتان بین اسٹوکس نے سیلاب متاثرین کی مدد کے لیے ٹیسٹ میچوں سے ملنے والی فیس کی تمام رقم عطیہ کرنے کا اعلان کیا ہے۔
بین اسٹوکس نے کہا کہ اس سال کے شروع میں پاکستان کو تباہ کرنے والے سیلاب کو دیکھ کر بہت دکھ ہوا اور سیلاب کے ملک اور عوام پر خاصے اثرات مرتب ہوئے۔
بین اسٹوکس کا کہنا تھا کہ کھیل نے میری زندگی میں مجھے بہت کچھ دیا ہے اور میں صرف یہی حق سمجھتا ہوں کہ کرکٹ سے بالاتر ہو کر کچھ واپس دوں، میں اس ٹیسٹ سیریز سے ملنے والی اپنی میچ فیس پاکستان سیلاب متاثرین کو عطیہ کروں گا۔
انہوں نے مزید کہا امید ہے کہ یہ عطیہ پاکستان کے سیلاب سے سب سے زیادہ متاثر ہونے والے علاقوں کی تعمیر نو میں مدد کرے گا۔
اسٹوکس کا کہنا تھا کہ 17 سال بعد پاکستان میں ٹیسٹ اسکواڈ کا حصہ ہونے پر بہت پُرجوش ہوں، تاریخی سیریز کے سلسلے میں پہلی مرتبہ پاکستان آکر بہت اچھا لگ رہا ہے، کھیلنے اور سپورٹ گروپ کے درمیان ذمے داری کا احساس ہے اور یہاں ہونا خاص بات ہے۔
