چنئی: بھارتی وی جے اور اداکارہ چترا کاماراج نے چنئی میں خودکشی کرلی۔
بھارتی میڈیا کے مطابق تامل اداکارہ چترا کاماراج گزشتہ شب ڈھائی بجے کے قریب شوٹنگ کے بعد اپنے ہوٹل کے کمرے میں آئیں اور آدھے سے ایک گھنٹے کے اندر اندر گلے میں پھندا لگاکر خودکشی کرلی۔
چترا کے ساتھ ہوٹل میں مقیم ان کے منگیتر اور بزنس مین ہیمنتھ نے، اداکارہ کی پُراسرار موت سے متعلق پولیس کو دیے گئے بیان میں بتایا کہ چترا شوٹنگ سے واپس آتے ہی نہانے گئیں اور جب وہ بہت دیر تک باہر نہ آئیں تو دروازے پر دستک دی، کوئی جواب نہ آنے پر ہیمنتھ نے ہوٹل انتظامیہ کو دروازے کی ڈپلیکیٹ چابی سے دروازہ کھولنے کو کہا اور جب ہوٹل انتظامیہ کے ساتھ اداکارہ کے منگیتر کمرے میں داخل ہوئے تو چترا کاماراج کو مردہ حالت میں پایا۔
پولیس کی جانب سے فی الحال تحقیقات کا سلسلہ جاری ہے، تاہم اداکارہ کی موت سے متعلق کوئی باضابطہ بیان جاری نہیں کیا گیا ہے۔
