اسلام آباد: لیبیا میں تارکین وطن کی کشتی کو پیش آئے حادثے میں جاں بحق ہونے والے پاکستان کے مختلف شہروں سے تعلق رکھنے والے شہری عرب ممالک پہنچے تھے۔
امیگریشن ذرائع کا کہنا ہے کہ لیبیا کشتی حادثے میں جاں بحق ہونے والوں میں سے 7 پاکستانیوں کی شناخت اور سفری تفصیلات سامنے آگئیں۔
ان پاکستانی مسافروں میں سے ایک نے تافتان بارڈر سے جب کہ بقیہ 6 مسافر کراچی، کوئٹہ، پشاور، اسلام آباد اور فیصل آباد ایئرپورٹس سے الگ الگ تاریخوں میں روانہ ہوئے تھے۔
مسافر شعیب حسین 10 جنوری 2025 کو تافتان بارڈر سے ایران گیا تھا جب کہ مسافر ثقلین حیدر 9 فروری 2024 کو کراچی ایئرپورٹ سے سعودی عرب پہنچا تھا۔
اسی طرح عابد حسین 25 نومبر 2024 کو کوئٹہ سے مصر، سراج الدین 31 دسمبر 2022 کو پشاور سے سعودی عرب، سید شہزاد حسین اسلام آباد سے سعودی عرب پہنچا۔
مسافر شعیب علی 19 نومبر 2024 کو فیصل آباد سے سعودیہ عرب اور مسرت حسین نے 20 ستمبر کو 2024 کوئٹہ سے متحدہ عرب امارات کا سفر کیا تھا۔
بعد ازاں یہ تمام مسافر کس طرح ڈوبنے والی کشتی تک پہنچے اور کہاں سے اپنے سفر کا آغاز کیا تھا اس کے بارے میں معلومات جمع کی جارہی ہیں۔