اسلام آباد: وفاقی حکومت نے مسیحی برادری سے تعلق رکھنے والے وفاقی ملازمین اور پنشنرز کو کرسمس کے موقع پر بڑا ریلیف دینے کا فیصلہ کرلیا۔
وزارت خزانہ حکام کے مطابق مسیحی برادری کے وفاقی ملازمین کی دسمبر 2025 کی تنخواہیں اور پنشنز ایڈوانس ادا کی جائیں گی۔
کرسمس کے موقع پر تنخواہیں اور پنشنز 22 دسمبر کو ادا کی جائیں گی، تاکہ مسیحی ملازمین اور پنشنرز اپنی مذہبی تقریبات اور تیاریوں کو بہ سہولت انجام دے سکیں۔
وزارت خزانہ نے کنٹرولر جنرل اکاؤنٹس اسلام آباد کو پیشگی ادائیگیوں کے انتظامات کرنے کی ہدایت جاری کردی ہے۔
ایڈوانس ادائیگی کا اطلاق مسیحی برادری سے تعلق رکھنے والے تمام اہل وفاقی ملازمین اور پنشنرز پر ہوگا۔
اس فیصلے سے مسیحی برادری کے وفاقی ملازمین میں خوشی کی لہر دوڑ گئی ہے۔
