کراچی: پچھلے کچھ دنوں سے اداکار دانش تیمور 4 شادیوں سے متعلق بیان پر شدید تنقید کا سامنا کررہے ہیں، اب اس بیان پر اداکار نے مداحوں سے معافی مانگ لی ہے۔
گزشتہ دنوں دانش تیمور کی اہلیہ اداکارہ عائزہ خان نے دانش کی میزبانی میں چلنے والی نجی ٹی وی کی رمضان ٹرانسمیشن میں بطور مہمان شرکت کی تھی، جہاں دانش نے 4 شادیوں سے متعلق ایک بیان دیا۔
دانش تیمور نے کہا کہ مجھے اللہ کی طرف سے 4 شادیوں کی اجازت ہے، میں کر نہیں رہا فی الحال یہ اور بات ہے۔
لفظ فی الحال اور 4 شادیوں کے بیان پر مداحوں سمیت سوشل میڈیا صارفین کی جانب سے انہیں تنقید کا نشانہ بنایا گیا جس پر اداکار نے معافی مانگ لی۔
دانش تیمور نے اپنے انسٹاگرام اکاؤنٹ پر ویڈیو شیئر کی، جس میں انہوں نے کہا کہ میں جانتا ہوں کہ آپ لوگ مجھ سے ناراض ہیں، میرے کچھ پرستار سمجھتے ہیں کہ میں نے اپنی بیوی عائزہ کی بے عزتی کی، لیکن ایسا نہیں ہے، میں اپنی بیوی سے پیار کرتا ہوں، الفاظ کا چناؤ شاید صحیح نہیں ہوا، میں اکثر لفظ فی الحال استعمال کرتا ہوں جو موجودہ حالات کی طرف اشارہ کرتا ہے۔
انہوں نے یہ بھی کہا کہ مجھے یقین ہے ہم سب ایک دن مر جائیں گے، الحمدللہ زندگی میں کبھی تنارع نہیں بنا، اس معاملے کو ختم کردیا جائے، جب میری نیت ہی ایسی نہیں اور دل ایسا نہیں تو بات کو بڑھانے کا کوئی فائدہ نہیں ہے۔
انہوں نے مزید کہا کہ اگر لوگوں کو لگتا ہے کہ میری بات سے ان کی دل آزاری ہوئی ہے تو میں معافی مانگتا ہوں، میں آپ کو پریشان نہیں کرنا چاہتا، میں نے آپ کو انٹرٹین کرنے کے لیے اپنی زندگی وقف کی ہے اور میں چاہتا ہوں کہ آپ سب خوش رہیں جیسے میں اپنے گھر میں اپنی بیوی بچوں کے ساتھ خوش رہتا ہوں۔
