گوجرانوالا: انسداد دہشت گردی عدالت نے وزیرآباد میں بانی پی ٹی آئی عمران خان کی ریلی پر فائرنگ اور حملے کے کیس کے مجرم نوید کو 2 بار عمر قید کی سزا سنادی۔
گوجرانوالا کی انسداد دہشت گردی عدالت نے 3 نومبر 2022 کو وزیرآباد میں ریلی کے دوران بانی پی ٹی آئی پر حملے کے مقدمے کی سماعت کی۔
انسداد دہشت گردی عدالت نے مقدمہ کا فیصلہ سناتے ہوئے مرکزی مجرم نوید احمد کو 2 بار عمر قید کی سزا سنائی۔
عدالت نے مقدمے کے دیگر ملزمان طیب بٹ اور وقاص کو بری کر دیا۔
عدالت نے فائرنگ سے جاں بحق معظم کو قتل کرنے کے جرم میں ملزم نوید کو ایک مرتبہ عمر قید کی سزا سنائی اور دہشت گردی کا جرم ثابت ہونے پر ایک اور مرتبہ عمر قید کی سزا سنائی گئی۔
مجرم کو چار افراد کو زخمی کرنے کے جرم میں تین سے پانچ سال تک قید کی سزا سنائی گئی اور اس پر 5 لاکھ روپے جرمانہ بھی عائد کیا گیا۔
عدالت نے مقدمہ کے زخمی گواہ بانی پی ٹی آئی کی عدم پیروی پر حق صفائی ختم کردیا۔
دوران سماعت عدالت نے بانی پی ٹی آئی کو 8 مرتبہ عدالت میں طلب کیا۔ بانی پی ٹی آئی کو متعدد بار اڈیالہ جیل سے ویڈیو لنک پر بھی پیش ہونے کا حکم دیا گیا لیکن انہوں نے بطور گواہ بیان ریکارڈ نہیں کروایا۔
خیال رہے کہ 3 نومبر کو وزیرآباد میں لانگ مارچ کے دوران چیئرمین پی ٹی آئی کے کنٹینر پر فائرنگ کا واقعہ پیش آیا تھا جس کے نتیجے میں ایک شخص جاں بحق جب کہ عمران خان سمیت 13 افراد زخمی ہوئے تھے، پولیس نے حملہ آورکو گرفتار کرلیا تھا۔
بانی پی ٹی آئی نے حملے کا الزام رانا ثناء اللہ، شہباز شریف اور ن لیگ کی قیادت پر لگایا تھا۔
