پاکستان اسٹیج اور کامیڈی کی دُنیا میں عمر شریف ایسا نام ہے، جو کسی تعارف کا محتاج نہیں۔ اُن کی شہرت کا ڈنکا چہار دانگ عالم میں خوب بجتا ہے۔ اُن ایسے عظیم فن کار صدیوں میں جنم لیتے ہیں۔ اُن کا نام سنتے ہی چہرے پر مسکراہٹ بکھر جاتی ہے۔
2009 میں وہ ایک نجی چینل پر مزاح سے بھرپور پروگرام ’’دی شریف شو‘‘ میں جلوہ گر ہوئے اور خوب داد سمیٹی۔ بھارت میں آج کل چلنے والے شوز اسی کا چربہ ہیں جو طرح طرح کے ناموں سے اب بھی پیش کیے جارہے ہیں۔کچھ سال قبل عمر شریف لاہور سے کراچی واپس آگئے۔ چند سال پہلے بھی اُنہیں صحت کے مسائل درپیش تھے۔ عمر شریف ایسے فنکار ہیں، جن کے چاہنے والوں کی تعداد بے شمار ہے۔ پاکستان ہی نہیں بلکہ بھارت کے بڑے بڑے نامور فنکار اُن کے دیوانے ہیں۔
دریں اثناء میڈیا سے گفتگو میں کامیڈی کنگ کی اہلیہ زریں عمر کا کہنا تھا کہ عمر شریف کے لیے ایک ایک لمحہ قیمتی ہے اور وقت گزرنے کے ساتھ اُن کی صحت بگڑ رہی ہے۔ ان کے مداح اُن کی صحت یابی کے لیے دعاگو ہیں۔ دعا ہے کہ اﷲ تعالیٰ عمر شریف کو صحت کلی عطا فرمائے، تاکہ وہ پھر سے لوگوں کے چہروں پر مسکراہٹ بکھیر سکیں۔