راولپنڈی: آرمی چیف اور برطانوی چیف آف ڈیفنس اسٹاف جنرل نکولس پیٹرک کے درمیان ملاقات میں جنرل قمر جاوید باجوہ نے پرنس فلپ کے انتقال پر تعزیت کرتے ہوئے کہا، پرنس فلپ کے انتقال سے دنیا انتہائی مہذب شخصیت سے محروم ہوگئی ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے برطانوی چیف آف ڈیفنس اسٹاف جنرل نکولس پیٹرک کی ملاقات ہوئی، ملاقات میں باہمی دلچسپی، علاقائی سیکیورٹی صورت حال پرتبادلہ خیال کیا گیا اور افغان مفاہمتی عمل پر ہونے والی تازہ پیش رفت پر بھی گفتگو سمیت باہمی دفاعی تعاون کے امور بھی زیر غور آئے۔
آئی ایس پی آر کا کہنا ہے کہ آرمی چیف جنرل قمر جاوید باجوہ نے پرنس فلپ کے انتقال پر اظہار تعزیت کرتے ہوئے کہا پرنس فلپ کے انتقال سے دنیا انتہائی مہذب شخصیت سے محروم ہوگئی ہے۔
برطانوی جنرل سر نکولس پیٹرک نے خطے میں استحکام کے لیے پاکستانی کوششوں کی تعریف کی جب کہ آرمی چیف نے بھی کورونا کے خلاف جنگ میں مدد پر اظہار تشکرکرتے ہوئے کہا کہ پاک فوج برطانیہ سے دوستانہ تعلقات کو خاص اہمیت دیتی ہے۔
یاد رہے چیف آف آرمی اسٹاف جنرل قمر جاوید باجوہ نے دورہ سعودی عرب میں سعودی مسلح افواج کے سربراہ سے ملاقات میں فوجی تعاون کو مزید فروغ دینے کی ضرورت پر زور دیتے ہوئے کہا تھا کہ پاک سعودی عرب تعاون کے خطے میں امن،سیکیورٹی پر مثبت اثرات ہیں۔
