کراچی: امریکا سے تعلق رکھنے والے معروف گلوکار بریٹ جیمز اہلیہ اور بیٹی سمیت طیارہ حادثے میں ہلاک ہوگئے۔
غیر ملکی خبر رساں ادارے کے مطابق 18 ستمبر کو گریمی ایوارڈ یافتہ امریکی گلوکار بریٹ جیمز اپنی اہلیہ اور 28 سالہ بیٹی کے ہمراہ نجی طیارے میں سوار تھے۔
نجی طیارے نے امریکی شہر نیش ول کے جان سی ٹیون ایئرپورٹ سے پرواز بھری تاہم 3 بجے کے قریب شمالی کیرولینا کے علاقے فرینکلن میں واقع اسکول کے قریب کھیت میں گرکر تباہ ہوگیا۔
حادثے میں بریٹ جیمز، ان کی اہلیہ اور بیٹی ہلاک ہوگئے، تاہم اسکول کے کسی طالب علم کی ہلاکت یا زخمی ہونے کی خبر سامنے نہیں آئی۔
امریکی میڈیا کے مطابق حادثے کا شکار طیارہ بریٹ جیمز کے نام پر رجسٹرڈ تھا تاہم حادثے کی وجہ فی الحال سامنے نہیں آسکی ہے۔
خیال رہے کہ 57 سالہ بریٹ جیمز نے 90 کی دہائی میں ایک سولو البم ریلیز کیا تھا، تاہم بریٹ پردے کے پیچھے سیکڑوں گانے لکھنے اور گانے کے سبب مداحوں میں زیادہ مشہور تھے۔
ان کی شاندار خدمات کی بدولت انہیں 2 مرتبہ گریمی ایوارڈ سے بھی نوازاجاچکا ہے۔
