فلموں، ڈراموں میں روتی خواتین کے مناظر زیادہ مقبولیت پاتے ہیں، رابعہ بٹ

کراچی: پاکستانی ڈراموں کی اُبھرتی ہوئی اداکارہ رابعہ بٹ کا کہنا ہے کہ رونے والی خواتین کے مناظر فلموں اور ڈراموں میں زیادہ مقبولیت حاصل کرتے ہیں۔
اداکارہ رابعہ بٹ نے ایک یونیورسٹی ایونٹ میں گفتگو کرتے ہوئے کہا، اگر ایک ڈرامہ عورت کے مضبوط کردار پر بنایا جائے تو وہ فلاپ ہوجاتا ہے۔
انہوں نے کہا کہ عام ناظرین ایسے ڈرامے اور فلمیں پسند کرتے ہیں جس میں عورت کو کمزور اور کمرے میں روتے ہوئے دکھایا جائے۔
انہوں نے بتایا کہ خواتین کے اسٹیریو ٹائپ کرداروں پر سارا ملبہ ڈائریکٹر اور اسکرپٹ رائٹرز پر نہیں ڈالا جاسکتا، جو چیز عوام میں بکتی ہے اسے ہی بنایا جاتا ہے۔
رابعہ بٹ نے لوگوں کے دوغلے پن کو نشانہ بناتے ہوئے کہا کہ جب لوگ کہتے ہیں کہ وہ کچھ الگ دیکھنا چاہتے ہیں تو وہ جھوٹ بولتے ہیں۔