کراچی: پاکستان سے تعلق رکھنے والی اداکارہ و ہدایت کارہ انجلین ملک نے کینسر میں مبتلا ہونے کا انکشاف کرتے ہوئے اپنی تصاویر سوشل میڈیا پر شیئرز کی ہیں۔
انجلین ملک نے انکشاف کیا کہ انہیں کینسر کی تشخیص ہوئی ہے، تاہم وہ اپنی بیماری کا ہمت اور حوصلے سے مقابلہ کررہی ہیں۔
کیموتھراپی کے عمل سے گزرنے والی انجلین ملک نے ان خواتین سے محبت اور یکجہتی کے طور پر اپنا سر منڈوالیا ہے جو اس وقت اس عمل سے گزر رہی ہیں اور اپنے اس اقدام کو ان تمام خواتین کے لیے ایک حوصلہ افزا پیغام قرار دیا ہے جو کینسر جیسے مرض کا سامنا کررہی ہیں۔
انجلین ملک نے سوشل میڈیا پر اپنی صحت سے متعلق وائرل ہونے والی پوسٹ کو ری پوسٹ کرکے خود کے کینسر میں مبتلا ہونے کی تصدیق کی ہے۔
انہوں نے کہا کہ وہ اپنی بیماری کو ایک پلیٹ فارم کے طور پر استعمال کرتے ہوئے روایتی خوبصورتی کے معیارات کو چیلنج کرنا چاہتی ہیں اور ان خواتین کے لیے ہمت و بہادری کی مثال بن رہی ہیں جو اس بیماری سے جنگ لڑرہی ہیں۔
سوشل میڈیا صارفین اور ساتھی فنکار انجلین ملک کے لیے نیک تمناؤں کا اظہار کرتے ہوئے اُن کی صحت یابی کے لیے دعاگو ہیں۔
