لاہور: وزیراعلیٰ پنجاب مریم نواز کے شوہر کیپٹن (ر) صفدر نے بیٹے کی شادی میں اہلیہ کے ساتھ تصاویر نہ ہونے کے سوال پر ردعمل ظاہر کیا ہے۔
حال ہی میں کیپٹن (ر) صفدر اور مریم نواز کے بیٹے جنید صفدر کی شادی ہوئی جس کے چرچے کئی روز تک سوشل میڈیا پر ہوئے۔
تقریب سے سامنے آنے والی زیادہ تر تصاویر مریم نواز کی تھیں جن میں کیپٹن صفدر کی کم تصاویر دیکھی گئیں۔
سوشل میڈیا صارفین نے سوال اٹھایا کہ بیٹے کی شادی پر میاں بیوی کی ساتھ ایک بھی تصویر نہیں، جس کا کیپٹن صفدر نے اب جواب دیا ہے۔
کیپٹن (ر) صفدر نے کہا اگر آپ کا دل کرتا ہے تو میں آج ہی جاکر سی ایم کے ساتھ کھڑا ہوں گا، تصویر بھیج دوں گا۔
ان کا کہنا تھا تصویروں کی بات نہیں ہوتی، دل جُڑے ہونے چاہئیں، ہمارا دل بہت زیادہ جُڑا ہوا ہے، وہاں دھڑکتا ہے تو پمپنگ یہاں ہوتی ہے، یہاں دھڑکتا ہے تو پمپنگ وہاں ہوتی ہے۔
ناقدین کے نام پیغام جاری کرتے ہوئے کیپٹن (ر) صفدر نے کہا کہ جن لوگوں نے بیٹے کی شادی پر تنقید کی، میں ان کے لیے دعا کروں گا کہ اللہ ان کے گھر بھی خوشیاں لائے، میں ناقدین سمیت مبارک باد پیش کرنے والوں کا شکریہ ادا کرتا ہوں۔
