ممبئی: بولی وُڈ کے ہی مین کہلانے والے لیجنڈری اداکار دھرمیندر انتقال کرگئے۔
بھارتی میڈیا کے مطابق کہ دھرمیندر 24 نومبر کو طویل علالت کے بعد 89 برس کی عمر میں چل بسے۔
رپورٹ کے مطابق دھرمیندر کو سانس لینے میں دشواری کی وجہ سے ممبئی کے بریچ کینڈی اسپتال میں داخل کرایا گیا تھا۔
واضح رہے کہ دھرمیندر کو دو ہفتے قبل بھی سانس لینے میں دشواری کے باعث اسپتال منتقل کیا گیا تھا، جس کے بعد بھارتی میڈیا نے ان کے انتقال کی جھوٹی خبریں نشر کی تھیں۔
اُس وقت دھرمیندر کے اہل خانہ نے بھارتی میڈیا کی جھوٹی خبروں پر سخت برہمی کا اظہار کرتے ہوئے ان کی تردید کی تھی۔
رپورٹس کے مطابق دھرمیندر نے اپنی آخری فلم ’اکیس‘ میں اداکاری کی تھی جو 25 دسمبر کو ریلیز کی جائے گی۔
دھرمیندر نے 1960 میں فلم دل بھی تیرا ہم بھی تیرے سے کیریئر کا آغاز کیا اور 6 دہائیوں پر مشتمل اپنے سفر میں بالی وڈ کو شعلے، یادوں کی بارات، میرا گاؤں میرا دیش، پھول اور پتھر جیسی یادگار فلمیں دیں۔ انہیں 2012 میں بھارتی حکومت نے پدم بھوشن ایوارڈ سے نوازا۔
پنجاب کے لدھیانہ میں دھرمیندر کیول کرشن دیول کے نام سے پیدا ہونے والے اداکار نے 19 سال کی عمر میں پرکاش کور سے شادی کی، بعدازاں وہ اداکارہ ہیما مالنی کے ساتھ رشتۂ ازدواج میں منسلک ہوئے۔
اپنی بڑھتی عمر کے باوجود دھرمیندر سوشل میڈیا پر متحرک رہے، وہ اکثر اپنی ویڈیوز میں کاشت کاری، صحت مند طرزِ زندگی اور مثبت سوچ کے بارے میں مشورے دیتے تھے۔
