دبئی: ایئر شو کے دوران بھارت کا جنگی طیارہ تیجس گر کر تباہ ہوگیا جس کے نتیجے میں پائلٹ بھی ہلاک ہوگیا۔
بھارتی ایئر فورس نے دبئی ایئر شو کے دوران مقامی طور پر تیار ہونے والے لڑاکا طیارے تیجس کے گر کر تباہ ہونے کی تصدیق کی ہے۔
بھارتی ایئرفورس کی جانب سے حادثے میں پائلٹ کے ہلاک ہونے کی بھی تصدیق کردی گئی ہے۔
امریکی میڈیا رپورٹس کے مطابق بھارتی طیارہ دبئی ایئرشو میں مظاہرے کے دوران گرا۔
بھارتی میڈیا کا بتانا ہے کہ دبئی ایئر شو کے دوران یہ حادثہ 2 بج کر 10 منٹ پر پیش آیا اور طیارہ دبئی ایئر شو کے ایروبیٹک اسٹنٹ کے دوران گرا۔
میڈیا رپورٹس کے مطابق گرنے والے طیارے کے پائلٹس کے بارے میں معلومات لی جارہی ہیں اور یہ پتا لگانے کی کوشش کی جارہی ہے کہ طیارہ تکنیکی خرابی کے باعث گرا یا پھر پائلٹ کی ناتجرکاری کی وجہ سے گرا۔
بھارتی میڈیا کا کہنا ہے کہ حادثے کا شکار ہونے والا طیارہ 2016 سے سروس میں موجود تھا۔
دبئی ایئر شو کے دوران لڑاکا طیاروں کے مظاہرے کا سیشن شائقین کا پسندیدہ ترین ایونٹ ہوتا ہے، تاہم بھارتی لڑاکا طیارے کو پیش آنے والے حادثے کے بعد یہ ایونٹ روک دیا گیا ہے۔
خیال رہے کہ چند روز قبل بھی دبئی ایئر شو کے دوران بھارتی لڑاکا طیارے کی ایک ویڈیو سامنے آئی تھی جس میں تیجس طیارے کے فیول ٹینک سے تیل لیک ہوتے دیکھا گیا تھا۔
بھارتی میڈیا کے مطابق تیجس بھارت میں مقامی طورپر تیار کیا گیا لڑاکا طیارہ ہے، دو سال سے بھی کم عرصےمیں تیجس طیارے کا یہ دوسرا حادثہ ہے
بھارتی میڈیا کا کہنا ہے کہ مارچ 2024 میں تیجس لڑاکا طیارہ راجستھان کے شہر جیسلمیر میں گر کر تباہ ہوا تھا۔
2001 میں تیجس طیارے کی پہلی آزمائشی پرواز ہوئی تھی۔
خیال رہے کہ دبئی ایئر شو کی تاریخ میں یہ پہلا موقع ہے کہ کوئی جہاز گر کر تباہ ہوا ہو۔
