کراچی: صوبہ سندھ میں پولیو سے بچائو کے قطرے پلانے سے انکار کرنے والے والدین کے خلاف کارروائی پر غور کیا جارہا ہے۔
وزیراعلیٰ سندھ مراد علی شاہ نے جمعہ کو وزیراعلیٰ ہاؤس میں پولیو کے خاتمے سے متعلق اجلاس کی صدارت کی، اس دوران انہوں نے کہا کہ میرے پاس کوئی دوسرا راستہ نہیں بچا، سوائے اس کے کہ ان لوگوں کو سزا دوں جو پولیو کے خاتمے کی اپنی قومی ذمے داری سے پہلوتہی کرتے ہیں۔
وزیراعلیٰ سندھ مراد علی شاہ نے اعلان کیا کہ ایسے والدین کے خلاف سخت اقدامات کیے جائیں گے جو اپنے بچوں کو پولیو سے بچائو کے قطرے پلانے سے انکار کرتے ہیں، جن میں ان کے موبائل فون کی سمز بند کرنا، قومی شناختی کارڈ اور پاسپورٹ معطل کرنا شامل ہے، تاکہ وہ مواصلاتی اور سفری سہولتوں سے محروم رہیں۔
وزیراعلیٰ مراد علی شاہ نے ساتھ ہی وزیراعلیٰ ہاؤس میں پولیو ویکسین انکار سیل قائم کرنے کا حکم دیا۔