کوئٹہ: ایف سی ہیڈکوارٹر پر خودکُش حملے میں 10 شہری شہید اور 30 سے زائد زخمی ہوگئے جب کہ خودکُش بمبار سمیت 6 دہشت گرد ہلاک ہوگئے۔
نجی ٹی وی کے مطابق بلوچستان کے دارالحکومت کوئٹہ کے علاقے ماڈل ٹاؤن میں خوجک روڈ پر ایف سی ہیڈکوارٹر کے مرکزی دروازے پر خودکُش بم دھماکا ہوا، جس کی شدت سے قریبی عمارتوں کے شیشے ٹوٹ گئے اور گاڑیوں کو شدید نقصان پہنچا۔
حملے میں 10 معصوم شہری شہید ہوگئے جب کہ 30 سے زائد افراد زخمی ہوئے، جن میں 2 سیکیورٹی اہلکاروں سمیت 4 خواتین بھی شامل ہیں۔
سیکیورٹی فورسز نے فوری کارروائی کرتے ہوئے حملہ آوروں کی کوشش کو ناکام بنادیا۔ دھماکے کے فوراً بعد فائرنگ کی آوازیں بھی سنی گئیں، جس سے علاقے میں خوف و ہراس پھیل گیا۔
حادثے کی تفصیلات بتاتے ہوئے سیکیورٹی ذرائع نے بتایا کہ خودکُش حملہ آور نے بارود سے بھری ایک گاڑی کو ایف سی ہیڈکوارٹر کے مرکزی دروازے سے ٹکرادیا۔ دھماکے کی شدت اتنی زیادہ تھی کہ کئی سو فٹ دُور تک عمارتوں کے شیشے اور کھڑی گاڑیوں کو نقصان پہنچا۔
ابتدائی تحقیقات کے مطابق حملہ بلوچستان میں جاری دہشت گردی کی ایک کڑی ہے، جس میں حملہ آوروں نے ہیڈکوارٹر میں داخل ہونے کی کوشش کی مگر سیکیورٹی فورسز کی بروقت کارروائی نے سازش ناکام بنادی۔