اسلام آباد: پاکستان بھر میں انسداد سروائیکل کینسر ویکسی نیشن کی پہلی قومی مہم کے لیے مقررہ کردہ اہداف حاصل نہ کیے جاسکے۔
اس ضمن میں نجی ٹی وی کا کہنا ہے کہ ذرائع کے مطابق انسداد ایچ پی وی ویکسی نیشن مہم 15 سے 27 ستمبر تک جاری رہی، اس دوران پنجاب میں 52 لاکھ بچیوں کو ویکسین لگائی گئی اور اس کا ہدف 68 فیصد رہا۔
اسی طرح سندھ میں 24 لاکھ بچیوں کو ایچ پی وی ویکسین لگ سکی اور مہم 65 فیصد ہدف حاصل کرسکی جب کہ آزاد کشمیر میں 97 ہزار117 اور اسلام آباد میں 46 ہزار 949 بچیوں کو ایچ پی وی ویکسین لگائی گئی۔
ذرائع نے بتایا کہ آزاد کشمیر میں ایچ پی وی مہم ہدف کا 39 فیصد رہی اور اسلام آباد میں 35 فیصد ہدف حاصل ہوا۔
خیبرپختون خوا، گلگت بلتستان اور بلوچستان میں یہ مہم نہیں چلائی گئی، بلوچستان میں مہم 2027، خیبرپختونخوا اور گلگت بلتستان میں 2026 میں چلائی جائے گی۔
ذرائع کے مطابق ایچ پی وی مہم کا ہدف ایک کروڑ 17 لاکھ بچیوں کی ویکسی نیشن تھا جب کہ انسداد سروائیکل ویکسی نیشن مہم کی قومی شرح 66.32 فیصد رہی جس کے مطابق مہم میں 77 لاکھ بچیوں کی ویکسی نیشن ہوسکی۔
