لندن: بین الاقوامی شہرت کی حامل، نوبل انعام یافتہ پاکستان سے تعلق رکھنے والی سماجی کارکن ملالہ یوسف زئی نے پاکستان میں سیلاب کے بعد ادارہ تعلیم و آگاہی کے لیے 2 لاکھ ڈالر گرانٹ کا اعلان کردیا۔
ملالہ یوسف زئی نے سوشل میڈیا پر بیان جاری کرتے ہوئے کہا کہ پاکستان میں آنے والے سیلاب نے ملک بھر میں اسکولوں کو تباہ کردیا اور کمیونٹیز کو شدید نقصان پہنچایا ہے۔
ملالہ یوسف زئی نے کہا کہ مشکل کی اس گھڑی میں پوری پاکستانی قوم کے ساتھ میری دلی ہمدردیاں ہیں۔
ملالہ کا کہنا تھا کہ اب ہمیں امدادی کاموں میں تعاون کرنے، انفرا اسٹرکچر کی تعمیر نو اور اس بات کو یقینی بنانے کے لیے لازماً متحد ہوجانا چاہیے کہ لڑکیاں اپنی تعلیم جاری رکھ سکیں۔
ملالہ نے ادارہ تعلیم و آگاہی کے لیے 2 لاکھ ڈالر جب کہ ماؤنٹین انسٹی ٹیوٹ فار ایجوکیشن اینڈ ڈیولپمنٹ کے لیے 30 ہزار ڈالر گرانٹ کا اعلان کیا۔
