کراچی: میزبان و اداکارہ ندا یاسر نے ہمایوں سعید کی زندگی میں پیش آنے والے سنگین حادثے کا انکشاف کردیا۔
ندا یاسر نے اپنے حالیہ پروگرام میں معروف اداکار ہمایوں سعید کے ماضی میں ایک سنگین حادثے کا شکار ہونے کا انکشاف کیا ہے۔ پروگرام میں بطور مہمان شریک ہونے والی اداکارائیں نتاشا علی، رُباب مسعود، حرا عمر اور ثناء عسکری کو ندا نے بتایا کہ ہمایوں سعید کو تھائی لینڈ میں ایک فلم کی شوٹنگ کے دوران خطرناک حادثہ پیش آیا تھا۔
ندا کے مطابق ہمایوں سعید جیٹ اسکیئنگ کرتے ہوئے پھسل گئے تھے، جس کے نتیجے میں ان کا جبڑا فریکچر ہوگیا۔ ندا نے مزید بتایا کہ چونکہ ان کے دیور ڈاکٹر فراز نواز ایک ڈینٹل سرجن ہیں، اس لیے ہمایوں سعید نے ان ہی سے علاج کروانے کا فیصلہ کیا۔
ان کا کہنا تھا کہ ہمایوں اس قدر ان کے دیور پر اعتماد کرتے تھے کہ انہوں نے کسی اور ڈاکٹر سے علاج کروانے سے انکار کردیا اور صرف درد کم کرنے کے لیے پین کلرز لیتے رہے جب تک ڈاکٹر فراز نواز سے اپائنٹمنٹ نہیں مل گیا۔
