ہانیہ عامر کی نئی تصاویر وائرل، کیا عاصم کیساتھ قربتیں پھر بڑھ رہی ہیں؟

کراچی: بین الاقوامی شہرت یافتہ اداکارہ ہانیہ عامر اور گلوکار عاصم اظہر کے درمیان دوبارہ بڑھتی ہوئی قربتوں کے اشارے سامنے آنے لگے ہیں۔
حال ہی میں ہانیہ عامر نے انسٹاگرام پر ساحلِ سمندر پر گزارے لمحات کی تصاویر شیئر کی ہیں جس میں مختلف مناظر شامل تھے۔ ایک تصویر میں ہانیہ کسی کے کندھے پر ہاتھ رکھ کر بیٹھی ہوئی دکھائی دیں، جس نے ان کے اور عاصم اظہر کے دوبارہ تعلقات کی افواہوں کو ہوا دے دی۔
یہی نہیں بلکہ مداحوں کی توجہ ایک تصویر میں موجود ہانیہ کے پینڈنٹ پر بھی گئی جو بظاہر بالکل ویسا ہی دکھتا ہے جیسا عاصم اظہر نے اپنی حالیہ عید کی تصاویر میں پہنا تھا۔
سوشل میڈیا پر صارفین اس مشابہت کو محض اتفاق نہیں بلکہ حقیقت قرار دیتے ہوئے قیاس آرائیاں شروع کردی ہیں کہ دونوں کے درمیان دوبارہ تعلقات قائم ہوچکے ہیں۔
خیال رہے کہ ہانیہ اور عاصم 2019 میں ایک دوسرے کے ساتھ قریبی تعلقات میں تھے جب کہ 2020 میں ان کا بریک اپ ہوگیا تھا جس کے بعد عاصم نے میرب علی سے منگنی کی، جو اب ختم ہو چکی ہے۔
ایسے میں مداح دونوں فنکاروں کی ممکنہ دوبارہ تعلقات کی خبروں پر نظر رکھے ہوئے ہیں اور ان کے ایک ہونے کی خواہش کا اظہار کررہے ہیں کیونکہ ان دونوں کی جوڑی سب کو بے حد پسند تھی اور وہ دل سے انہیں دوبارہ ایک ساتھ دیکھنا چاہتے ہیں۔