لاہور: ٹی وی کے سینئر اداکار توقیر ناصر نے موجودہ شوبز انڈسٹری کے رجحانات پر تنقیدی تبصرہ کرتے ہوئے کہا کہ آج کے ڈراموں میں خلوص، سچائی اور جذبات کے بجائے ظاہری خوبصورتی اور دکھاوے کو زیادہ اہمیت دی جارہی ہے۔
نجی ٹی وی کے ایک پروگرام میں گفتگو کے دوران توقیر ناصر کا کہنا تھا کہ ماضی کے فنکار اپنے کرداروں سے جذباتی طور پر جُڑے ہوتے تھے اور ان کی اداکاری میں فطری انداز اور سچائی جھلکتی تھی جب کہ آج کل کی اداکاری میں اصل جذبات کے بجائے میک اپ اور سرجری سے بنائے گئے خدوخال نمایاں ہورہے ہیں۔
توقیر ناصر نے خاص طور پر اداکاراؤں میں بڑھتے ہوئے پلاسٹک سرجری کے رجحان پر تشویش کا اظہار کرتے ہوئے کہا کہ مصنوعی حسن نے ان کے چہروں کو مصنوعی جیسا بنادیا ہے جب کہ ماضی کی اداکارائیں سادگی پسند تھیں اور قدرتی طور پر خوبصورت ہوتی تھیں۔
انہوں نے ہدایت کاروں کے کام کرنے کے انداز پر بھی سوال اٹھائے اور کہا کہ پہلے ڈائریکٹر سیٹ پر موجود رہتے تھے اور فنکاروں کی رہنمائی کرتے تھے، کردار میں ڈھلنے میں اداکاروں کی رہنمائی کرتے تھے جب کہ اب زیادہ تر صرف مانیٹر پر نظر رکھتے ہیں جس سے اداکاری کا معیار متاثر ہورہا ہے۔
