کراچی: پاکستانی فلموں اور ڈراموں کی مقبول اداکارہ صنم سعید نے جلد ماں بننے کی تصدیق کردی۔
اداکارہ صنم سعید نے ماؤں کے عالمی دن کے موقع پر انسٹاگرام پر اپنی والدہ کے ساتھ تصویر شیئر کی اور مداحوں کو مبارک باد دیتے ہوئے مستقبل میں اپنی والدہ جیسا بننے کی خواہش کا اظہار کیا۔
صنم سعید نے اپنی والدہ کے لیے ایک دل چھو لینے والا پیغام لکھتے ہوئے ماں بننے کی خوشی سب کے ساتھ بانٹی۔
انہوں نے کہا کہ مدرز ڈے کے موقع پر میں اپنی ماں کا شکریہ ادا کرنا چاہتی ہوں کہ انہوں نے مجھے ہمیشہ بے پناہ محبت اور حفاظت دی، میں دعاگو ہوں کہ میں بھی اُن جیسی مہربان، مضبوط اور نڈر ماں بن سکوں۔
اداکارہ کے اس اعلان پر سوشل میڈیا پر مبارک بادوں کا تانتا بندھ گیا۔
ایک صارف نے لکھا کہ اللّٰہ آپ کو صحت مند، خوبصورت اولاد عطا کرے، ماں بننے کا تجربہ زندگی کا سب سے حسین لمحہ ہے۔
ایک اور مداح نے کہا، ہم نے ہمیشہ آپ کو ایک مضبوط کردار میں دیکھا، اب ماں کے روپ میں دیکھنے کا انتظار ہے۔
خیال رہے کہ صنم اور محب مرزا کی شادی ابتدا میں پوشیدہ رہی مگر بعدازاں دونوں نے اعلان کیا کہ وہ ایک دوسرے کے ساتھ رشتہ ازدواج میں منسلک ہوچکے ہیں۔
