کراچی: سینئر اداکار فیصل قریشی نے حالیہ واقعات پر ردِعمل دیتے ہوئے بھارتی فنکاروں کی جانب سے پاکستان پر حملے کی خوشی منانے کو افسوس ناک اور بزدلانہ عمل قرار دیا ہے۔
فیصل قریشی نے ایک ویڈیو بیان میں بھارت کے بزدلانہ حملے کے باعث ایک بچے کی شہادت کو دل دہلا دینے والا واقعہ قرار دیتے ہوئے کہا کہ کسی بھی انسانی سانحے پر خوشی منانا شرم ناک ہے۔
انہوں نے کہا کہ پہلگام میں جو کچھ ہوا وہ ابھی تک ثابت نہیں ہوا نہ ہی ہوگا مگر آپ لوگوں نے جو کچھ کیا، وہ پوری دنیا نے دیکھا ہے۔ انہوں نے بھارتیوں سے سوال کیا کہ تمہیں کون سی کامیابی ملی ہے، تم لوگوں کے جہاز گِرے ہیں، تم لوگوں نے بچے کو شہید کیا، جس کا ہمیں بہت دکھ ہے۔
فیصل قریشی نے بھارتی فنکاروں کو آڑے ہاتھوں لیتے ہوئے کہا کہ ہم مسلمانوں کے لیے شہادت ایک معبتر چیز ہے، لیکن تم لوگوں کی وجہ سے ایک بے گناہ بچہ شہید ہوا ہے۔
فیصل قریشی نے اس بات پر بھی زور دیا کہ ہم پاکستانیوں کو اظہارِ رائے کی آزادی حاصل ہے جب کہ بھارتی فنکار دباؤ کے تحت ریاستی بیانیے کی حمایت کرنے پر مجبور ہیں۔