آسٹریلیا میں ہیٹ ویو کے باعث دوران کھیل پاکستانی نژاد کرکٹر انتقال کرگیا

ایڈیلیڈ: کرکٹ میچ کھیلتے ہوئے ہیٹ ویو کے باعث پاکستانی نژاد کھلاڑی جان کی بازی ہار گیا۔
آسٹریلوی میڈیا کے مطابق جنوبی آسٹریلیا میں کونکورڈیا کالج اوول میں ہیٹ ویو کے دوران میچ کھیلا جارہا تھا، اس دوران 40 سالہ پاکستانی نژاد کرکٹر جنید ظفر خان گرپڑے اور پھر اٹھ نہ سکے۔
رپورٹس کے مطابق جس وقت میچ کھیلا جارہا تھا، اُس وقت درجہ حرارت 41.7 ڈگری سینٹی گریڈ تھا، اولڈ کونکورڈیا کرکٹ کلب کے کھلاڑی نے پہلے 40 اوورز فیلڈنگ کی پھر 7 اوورز بیٹنگ کی۔
آسٹریلوی میڈیا کے مطابق کرکٹر کے گراؤنڈ پر گرتے ہی ایمبولینس کو طلب کیا گیا اور طبی عملے نے سی پی آر کیا لیکن وہ جنید ظفر کی جان نہ بچاسکے۔
کرکٹر کے دوست نے میڈیا سے گفتگو کرتے ہوئے بتایا کہ جنید ظفر خان روزے رکھ رہے تھے، لیکن میچ کے دن وہ پانی پیتے دکھائی دیے۔
کلب کی طرف سے جاری بیان میں کہا گیا کہ پیرا میڈکس نے بہترین کوشش کی، لیکن افسوس کہ کرکٹر جانبر نہ ہوسکے، کلب کے کھلاڑی کے انتقال پر بہت افسردہ ہیں۔
ایڈیلیڈ ٹرف کرکٹ ایسوسی ایشن کے قوانین کے مطابق اگر درجہ حرارت 42 سینٹی گریڈ سے اوپر ہو تو میچ منسوخ کردیا جاتا ہے اور درجہ حرارت اگر 40 سے اوپر ہو تو خصوصی احتیاطی تدابیر کے ساتھ میچز کھیلے جاتے ہیں۔
صدر اسلامک سوسائٹی کے مطابق جنید ظفر خان کے انتقال کی کوئی باضابطہ وجہ تاحال نہیں بتائی گئی جب کہ ایسی کوئی شہادت نہیں ملتی کہ روزہ ر کھنا ہی اچانک طبی واقعات کی وجہ بنتا ہے۔