کراچی: اداکارہ اور میزبان فضا علی کی بیٹی ابھی بہت چھوٹی ہیں، اس کے باوجود اداکارہ نے ابھی سے داماد تلاش کرنے کی اپنی حکمتِ عملی کا اظہار کیا ہے۔
فضا علی نے حال ہی میں نجی ٹی وی کی رمضان ٹرانسمیشن کے دوران اپنی بیٹی فرال کی شادی کے حوالے سے حکمت عملی کے بارے میں بات کی۔
انہوں نے کہا کہ جب میں اپنی بیٹی فرال کی شادی کروں گی تو جس بھی لڑکے کا انتخاب کروں گی اس کے گھر خود جاؤں گی، پہلے لڑکے کو دیکھوں گی، اس کے تمام دوستوں سے ملوں گی، اس کے ساتھ کچھ وقت گزاروں گی تاکہ اس کے رہن سہن اور دوسروں کے ساتھ اس کے رویے کا علم ہوسکے۔
انہوں نے کہا کہ میں بالخصوص اُس لڑکے کا عورتوں کے ساتھ رویہ دیکھوں گی، اس چیز کو بھی دیکھوں گی کہ اس کی زبان کیسی ہے، دوستوں میں اٹھتے بیٹھتے وقت غلط زبان کا استعمال تو نہیں کرتا۔
فضا علی نے بتایا کہ میں لڑکے کی شخصیت کو اچھے سے پرکھوں گی اور اس کے بعد اگر مجھے لگا کہ وہ میری بیٹی کے لیے موزوں ہے تب ہی میں شادی کے لیے رضامندی کا اظہار کروں گی۔
