کبھی کسی سے پیار کیا نہ کسی کرکٹر میں دلچسپی رہی، میرا

کراچی: پاکستانی فلموں کی اداکارہ میرا نے حال ہی میں ایک انٹرویو میں ایسے دعوے کیے ہیں کہ سوشل میڈیا صارفین اُن کے دعووں پر طنز کے نشتر برسارہے ہیں۔
میرا نے کہا کہ جب وہ بھارت میں کام کرنے گئی تھیں، تو ان کے حُسن کا موازنہ بولی وُڈ کی دو دیویوں ایشوریا رائے اور مادھوری سے کیا گیا تھا۔
میرا نے انٹرویو میں یہ بھی بتایا کہ انہیں کبھی کسی کرکٹر میں دلچسپی نہیں رہی، اور نہ ہی انہوں نے کبھی کسی سے پیار کیا۔
جب ان سے پوچھا گیا کہ کیا انہوں نے شادی کے لیے دولہا تلاش کرلیا ہے، تو میرا نے پُراسرار انداز میں جواب دیا، ’’کچھ کچھ ہے‘‘۔ یعنی، دولہا تلاش کرنے کا معاملہ ابھی تک ’’انڈر پروسیس‘‘ ہے۔
میرا نے بتایا کہ وہ اس وقت ایک فلم اور ڈرامے کی شوٹنگ میں مصروف ہیں۔ اس کے علاوہ، وہ جلد ہی مائی ڈیئر ہسبینڈ نامی پروجیکٹ کا آغاز کرنے والی ہیں۔ شاید یہ منصوبہ ان کی شادی کی تیاریوں کا حصہ ہو، کیونکہ ’’کچھ کچھ ہے‘‘ والی بات تو انہوں نے کر ہی دی ہے۔
میرا نے یہ بھی بتایا کہ بھارت میں ان کی پرانی فلم ’سمرن‘ کو دوبارہ ریلیز کیا گیا ہے، اور بھارتی مداح اسے کافی پسند کررہے ہیں۔ ان کے مطابق، ڈسٹری بیوٹرز نے انہیں بتایا کہ فلم پورے بھارت میں ہٹ ہورہی ہے۔
میرا کے ان دعوؤں پر سوشل میڈیا صارفین نے دلچسپ تبصرے کیے۔ ایک صارف نے لکھا، ’’میرا کی بات سن کر ایشوریا رائے اور مادھوری ڈکشٹ نے خودکشی کرلی ہوگی!‘‘ دوسرے صارف نے لکھا، ’’میرا نے تو بولی وُڈ کو بھی اپنے حسن کے سامنے ہار منوا دی۔‘‘ کچھ صارفین نے مزید لکھا، اب تو میرا کو ملکۂ حُسن کا خطاب دے دینا چاہیے۔