کراچی: پاکستان کرکٹ ٹیم کے اوپنر فخر زمان نے چیمپئنز ٹرافی کے آغاز سے محض چند روز قبل چھکوں کو لے کر بڑی ڈیمانڈ کرڈالی۔
پی سی بی کے پوڈکاسٹ میں سلمان بٹ کو انٹرویو دیتے ہوئے قومی ٹیم کے اوپنر فخر زمان نے ایک سوال کے جواب میں کہا کہ اگر 90 میٹر سے لمبا چھکا لگایا جائے تو اس پر 2 اضافی رنز ملنے چاہئیں۔
فخر زمان نے بابراعظم سے متعلق ٹوئٹ کے سوال پر کہا کہ ٹیم سے باہر ہونے کی وجہ انجری تھی، جس کی تشخیص میں تاخیر ہوئی تو کم بیک مشکل ہوا، انہوں نے کہا کہ ڈومیسٹک کھیل کر واپس آنے کی کوشش کررہا تھا، کیونکہ بیماری کے بعد ایسا لگا جیسے پہلی بار کرکٹ کھیل رہا ہوں۔
فخر نے کہا کہ بابراعظم کے لیے ہونے والی ٹوئٹ کے ساتھ میری پلیئنگ الیون میں شمولیت کو جوڑا جانا غلط تھا، مجھے باہر بھی کئی لوگوں نے یہی سوال کیا، لیکن انہیں سمجھانے کی کوشش، تاہم فینز وہی سمجھتے ہیں جو انہیں اچھا لگتا ہے۔
چیمپئنز ٹرافی میں بابراعظم کے ساتھ اوپننگ پر فخر زمان نے کہا کہ ان کے پاس ون ڈے کرکٹ کیلئے اچھی شارٹ سلیکشن ہے البتہ کوشش ہوگی بڑی ٹیم کے خلاف شاندار کارکردگی کا مظاہرہ کروں۔
انہوں نے کہا کہ بھارت کے خلاف میڈیا ہائپ کی وجہ سے کھلاڑیوں پر زیادہ پریشر ہوتا ہے، لیکن عام میچ کی طرح کھیلتے ہیں، کوئی اضافی ٹریننگ نہیں ہوتی البتہ اسکلز کا مقابلہ ہوتا ہے۔
اوپنر نے 2017 چیمپئینز ٹرافی کو یاد کرتے ہوئے کہا کہ میں اس وقت جونیئر تھا لیکن کپتان سرفراز بھائی، شعیب ملک اور جنید خان نے بہت کچھ سکھایا، سیفی بھائی نے کئی مواقع پر مجھے درست کیا۔
