کراچی: پاکستان کے اُبھرتے ہوئے اداکار عمر عالم نے دوران پرواز اپنی دوست کو شادی کی پیشکش کرکے ان سے منگنی کرلی۔
رئیلٹی شو تماشا کے پہلے سیزن کے فاتح عمر عالم نے پرواز کے دوران ہی اپنی محبوبہ کو پروپوز کیا، جس کی ویڈیو سوشل میڈیا کی زینت بنی ہوئی ہے۔
اداکار نے خود بھی اپنی زندگی کے خاص ترین لمحے کی ویڈیو سوشل میڈیا پر شیئر کی۔
ویڈیو میں دیکھا جاسکتا ہے کہ عمر عالم نے دوران پرواز بھرے ہوئے جہاز میں اپنی محبوبہ سے اظہار محبت کرتے ہوئے خوبصورت و رومانوی انداز میں انگوٹھی پیش کی اور شادی کے لیے پوچھا۔
جواب میں ان کی دوست نے ہاں کردی اور انگوٹھی بھی پہن لی جب کہ جہاز میں بیٹھے مسافروں کی جانب سے دونوں کے لیے نیک خواہشات کا اظہار کیا گیا۔
انسٹا پوسٹ کے کیپشن میں عمر عالم نے لکھا کہ اس نے ہاں کہہ دی، اب یہ آفیشل ہوگیا ہے۔
اداکار عمر عالم کی جانب سے شیئر ویڈیو کے کمنٹس میں تبصرہ کرتے ہوئے ساتھی فنکاروں اور مداحوں نے اس جوڑی کو مبارکبادیں پیش کیں جن میں ایمن خان، منال خان، منشا پاشا، کنزہ ہاشمی اور ماہم عامر وغیرہ شامل ہیں۔
خیال رہے کہ عمر عالم نے رئیلٹی شو تماشا سیزن ون سے شہرت حاصل کی جب کہ ان کے مشہور ڈراموں میں پہلی سی محبت، رقصِ بسمل اور گُرو سمیت دیگر شامل ہیں۔
