لزبن: اسٹار فٹبالر کرسٹیانو رونالڈو کے بیٹے کی مسٹر بیسٹ کے ساتھ پروگرام میں سوال کے جواب میں ”ان شاء اللہ” کہنے کی ویڈیو سوشل میڈیا پر تیزی سے وائرل ہوگئی۔
گزشتہ دنوں النصر فٹ بال کلب کے سابق گول کیپر ولید عبداللہ کا انٹرویو وائرل ہوا تھا جس میں وہ یہ بتارہے تھے کہ کرسٹیانو رونالڈو حقیقی طور پر اسلام قبول کرنا چاہتے ہیں اور وہ گراؤنڈ میں سجدہ کرکے اس بات کا اظہار کرچکے ہیں۔
انہوں نے بتایا کہ رونالڈو حقیقی طور پر اسلام قبول کرنا چاہتے ہیں اور اس کے بارے میں انہوں نے مجھ سے کئی بار بات کی اور دلچسپی بھی ظاہر کی تھی، باپ کا اثر بیٹے پر بھی ظاہر ہورہا ہے، ایک پوڈ کاسٹ کے دوران رونالڈو کے بیٹے نے ”ان شاء اللہ” بول کر مداحوں کو خوش گواریت میں مبتلا کردیا۔
حال ہی میں کرسٹیانو رونالڈو نے مسٹر بیسٹ کے ساتھ ایک ویڈیو یوٹیوب پر اپ لوڈ کی، جو یوٹیوب پلیٹ فارم پر ان کے سب سے بڑے حریف سمجھے جاتے ہیں، کیونکہ اس وقت یوٹیوب پر ان کے قریباً 331 ملین سبسکرائبرز ہیں اور وہ یوٹیوب کے سب سے بڑے اسٹار سمجھے جاتے ہیں۔ اس ویڈیو میں جونیئر رونالڈو یعنی کرسٹیانو رونالڈو کے بیٹے بھی نظر آئے۔
مسٹر بیسٹ نے کرسٹیانو رونالڈو جونیئر سے پوچھا کہ کیا آپ نے باسکٹ بال میں لیجنڈ لیبرون جیمز اور ان کے بیٹے برونی جیمز کی جوڑی کو کھیلتے ہوئے دیکھا تھا جس پر انہوں نے ہاں میں جواب دیا تو مسٹر بیسٹ نے کہا، کیا آپ بھی اپنے والد کے ساتھ ایسے ہی کھیلیں گے، جس پر کرسٹیانو رونالڈو جونیئر نے کہا، ان شاء اللہ، بیٹے کی اس بات پر رونالڈو نے مسٹر بیسٹ کو کہا کہ امید ہے ایسا ہوگا۔
