کراچی: پاکستان کرکٹ ٹیم کے مایہ ناز آل راؤنڈر شعیب ملک کی اہلیہ اور بھارتی ٹینس اسٹار ثانیہ مرزا کراچی کی آلو والی بریانی کی دیوانی نکلیں۔
کھیل کی دُنیا کا یہ مقبول جوڑا ان دنوں پاکستان میں ہے، جہاں وہ مختلف شہروں میں مختلف تقریبات میں شریک ہورہے ہیں، ان تقریبات میں ثانیہ مرزا کی گفتگو بھی سوشل میڈیا پر خاصی وائرل ہورہی ہے۔
ایک ایسی ہی ویڈیو سوشل میڈیا پر شیئر کی گئی ہے جس میں ثانیہ مرزا کو کراچی کی آلو والی بریانی کی تعریف کرتے دیکھا جاسکتا ہے۔
ویڈیو میں ثانیہ سے سوال کیا جاتا ہے کہ انہیں کراچی کی بریانی کیسے لگی؟ جس کے جواب میں ثانیہ کا کہنا تھا کہ میرا خیال ہے کہ کراچی آکر آلو والی بریانی نہ کھائی تو سمجھو کچھ نہ کھایا۔
بھارتی ٹینس اسٹار کا کہنا تھا کہ میں بھارت کے شہر حیدرآباد دکن سے ہوں جہاں کی بریانی بہت مشہور ہے، اگر میں کہہ رہی ہوں کہ بریانی بہت اچھی ہے تو واقعی کراچی کی بریانی بہت اچھی ہے۔