کراچی: پاکستان اور جنوبی افریقا کی کرکٹ ٹیموں کے مابین کھیلے جارہے پہلے ٹیسٹ کا دوسرا روز فواد عالم کے نام رہا، جنہوں نے ناصرف اظہر علی، محمد رضوان اور فہیم اشرف کے ساتھ شان دار شراکتیں قائم کرتے ہوئے پاکستان کو مہمان ٹیم پر برتری دلائی بلکہ اپنے کیِریئر کی تیسری سنچری بھی مکمل کی۔
فواد عالم نے وکٹ کے چاروں طرف دلکش اسٹروک کھیلے۔ وہ 109 رنز بناکر نگیدی کی گیند پر آؤٹ ہوئے۔ اُن کی اننگز 9 چوکوں اور 2 چھکوں سے مزین رہی۔ انہوں نے اپنے کیریئر کی تیسری سنچری بھی کیشیو مہاراج کو چھکا جڑ کر مکمل کی۔
