کراچی: پاکستان رینجرز (سندھ) اور پاک آرمی کے جوانوں نے مخیر حضرات کے تعاون سے شہر کے مختلف علاقوں میں راشن اور اشیائے خورونوش تقسیم کیں۔
تفصیلات کے مطابق کورونا بحران کے باعث نافذ حفاظتی لاک ڈاؤن کے دوران کورنگی (UC-31)، ضیاء کالونی، ایس ایف ٹی (UC-13)، کھوکھراپار ملیر، لانڈھی اور عظیم گبول گوٹھ کے علاقوں میں راشن اور اشیائے خورونوش تقسیم کی گئیں۔
اس دوران دیہاڑی دار طبقہ اور بے روزگار افراد میں راشن کے 2 ہزار سے زائد بیگز تقسیم کیے گئے۔
پاک آرمی اور رینجرز کی جانب سے شہریوں کو سوشل ڈسٹینسنگ اور کورونا سے حفاظتی اقدامات کے بارے میں آگاہی بھی فراہم کی گئی۔
ساتھ ہی عوام سے اپیل کی کہ نظم وضبط کو برقرار رکھیں، غیر ضروری طور پر گھر سے باہر نہ نکلیں، تاکہ آپ کی خدمت کو یقینی بنایا جا سکے۔
اس موقع پر علاقہ مکینوں نے پاک آرمی اور سندھ رینجرز کی جانب سے کیے جانے والے اقدامات کو سراہتے ہوئے خراجِ تحسین پیش کیا۔