اسلام آباد: پاک فضائیہ کا ایف 16 طیارہ شکر پڑیاں کے قریب گر کر تباہ ہوگیا، جس کے نتیجے میں ونگ کمانڈر نعمان اکرم شہید ہوگئے۔ پی اے ایف کے ترجمان کے مطابق پاک فضائیہ کا ایف 16 طیارہ شکرپڑیاں کے قریب گر کر تباہ ہوگیا جب کہ حادثے میں پائلٹ ونگ کمانڈر نعمان اکرم بھی شہید ہوگئے، طیارہ یوم پاکستان پریڈ کی ریہرسل میں مصروف تھا جب کہ ایئر ہیڈکوارٹرز نے حادثے کی تحقیقات کے لیے بورڈ آف انکوائری تشکیل دے دیا ہے۔
دوسری طرف قومی اسمبلی میں شہید پائلٹ ونگ کمانڈر نعمان اکرم کے لیے دعائے مغفرت بھی کرائی گئی۔وزیراعظم عمران خان نے بھی ایف 16 طیارہ حادثے پر افسوس کا اظہار کرتے ہوئے شہید کے درجات کی بلندی کے لیے دعا کی۔ سماجی ذرائع ابلاغ پر وائرل ویڈیو میں دیکھا جاسکتا ہے کہ دوران پرواز طیارے کا رخ اچانک زمین کی طرف ہوا اور گرکر تباہ ہوگیا، طیارہ گرنے کے بعد آگ کے شعلے اور دھویں کے بادل اٹھتے نظر آرہے تھے۔