کےالیکٹرک کو اضافی فرنس آئل اور گیس کی فراہمی کے باوجود لوڈشیڈنگ کا دورانیہ بڑھ گیا، کراچی کے بیشترعلاقوں میں لوڈ شیڈنگ کا مجموعی دورانیہ12گھنٹے تک کردیا گیا۔ نیپرا کی سماعت کے باوجود شہر قائد میں بجلی کی لوڈشیڈنگ کے دورانیے میں اضافہ ہوگیا ہے، لوڈشیڈنگ سے مستثنیٰ علاقوں میں رات گئے بجلی نہ ہونے سے علاقہ مکین اذیت میں مبتلا رہے۔ذرائع کا کہنا ہے کہ کراچی کے مختلف علاقوں میں رات گئے ایف بی ایریا، گڈاپ کاٹھور،کاظم آباد،ماڈل کالونی میں بجلی کی فراہمی معطل رہی۔احسن آباد ،گلشن معمار، لیاقت آباد ،ناظم آباد کے مختلف علاقوں میں بھی غیر اعلانیہ لوڈیشڈنگ کا سلسلہ وقفے وقفے سے جاری ہے جس کی وجہ سے شہریوں کو شدید اذیت کا سامنا کرنا پڑ رہا ہے۔اس کے علاوہ گلشن معمار،سر سید ٹاؤن،کیماڑی کے مختلف علاقوں میں بھی لوڈشیڈنگ کا جن بے قابو رہا اور شہریوں نے گرمی اور حبس میں رات جاگ کر گزاری۔شارع پاکستان کے اطراف فیڈرل بی ایریا کے مختلف بلاکس میں بھی رات گئے بجلی کی فراہمی معطل رہی جبکہ گلشن اقبال، ناظم آباد، گلبہار اور گرومندر کے اطراف آباد مکینوں نے بھی بجلی کی غیر اعلانیہ لوڈ شیڈنگ کی شکایت کیں
