نئے سال پر رومانوی گیتوں کا تحفہ پسند آئے گا، سائرہ پیٹر

لندن: پاکستانی نژاد برطانوی اوپیرا اسٹار سائرہ پیٹر نے نئے سال پر موسیقی کے دیوانوں کے لیے نئے رومانوی گیتوں کے ریلیز کی تیاریاں شروع کردیں۔ سال کا آغاز پارٹی اور رومانٹک سونگ اے زندگی اے زندگی آئندہ ہفتے ریلیز کریں گی جب کہ فروری میں ممتاز موسیقار خواجہ خورشید انور کا غیر ریلیز شدہ گیت۔ بجے دل کی ستار کی شاندار ویڈیو دنیا بھر میں ریلیز کریں گی۔
لندن سے گفتگو کرتے ہوئے پاکستان کی پہلی اوپیرا سنگر سائرہ پیٹر نے بتایا کہ کورونا کی وجہ سے ہم فن کاروں کو اپنے نئے اور دل چھولینے والے گیتوں کی تیاریوں کے لیے وقت مل گیا۔ اس لیے میں نے نئے گیتوں پرساری توجہ دی اب نیا سال شروع ہوگیا ہے۔ لہٰذا اپنے مداحوں کو نئے سال کا تحفہ سماعتوں میں رس گھولنے والے گیتوں کی شکل میں دوں، اس سلسلے میں پہلا گیت ۔۔اے زندگی اے زندگی۔ دنیا بھر میں ریلیز کیا جائے گا، اس کی موسیقی میں نے خود ترتیب دی ہے، اس گانے کی ویڈیو میں امریکی اور برطانوی ڈانسرز نے کمال کا رقص پیش کیا ہے۔ یہ ایک پارٹی سونگ ہے جو نئی نسل خاص طور پر نوجوانوں کے دل جیت لے گا۔
انہوں نے کہا دوسرا گیت بجے دل کی ستار۔۔ آئندہ ماہ ریلیز کیا جائے گا، اس گانے کی موسیقی برصغیر کے نامور موسیقار خواجہ خورشید انور نے فلم تان سین کے لیے دی تھی۔ کسی وجہ سے فلم مکمل نہ ہوسکی تو گانے بھی سامعین تک نہیں پہنچے۔ اب خواجہ خورشید انور کے صاحب زادے خواجہ عرفان نے یہ گیت مجھ سے نئے انداز سے گوایا ہے۔مجھے بے حد خوشی ہورہی ہے کہ میں اتنے بڑے موسیقار کی ترتیب دی ہوئی موسیقی میں اپنی آواز کا جادو جگارہی ہوں، امید ہے مذکورہ دونوں گیت موسیقی کے چاہنے والوں کو پسند آئیں گے۔