کراچی: محکمۂ تعلیم سندھ نے صوبے بھر کے سرکاری اور نجی اسکولوں کو یکم اگست سے ہفتے میں چھ روز کھولنے کے احکامات جاری کردیے ہیں۔ اس حوالے سے محکمہ تعلیم کی جانب سے باقاعدہ نوٹیفکیشن بھی جاری کر دیا گیا ہے۔
نوٹیفکیشن کے مطابق یکم اگست سے سندھ بھر کے تمام سرکاری اور نجی تعلیمی اداروں میں پیر سے ہفتہ تک باقاعدگی سے تدریسی سرگرمیاں جاری رہیں گی جبکہ اتوار کو تعطیل ہوگی۔ محکمہ تعلیم نے تمام ضلعی تعلیمی افسران، اسکول سربراہان اور نجی تعلیمی اداروں کی انتظامیہ کو ہدایت کی ہے کہ وہ نئے شیڈول پر سختی سے عمل درآمد یقینی بنائیں۔
محکمۂ تعلیم کا کہنا ہے کہ اسکولوں میں تعلیمی سرگرمیوں کا تسلسل برقرار رکھنے، نصاب کو بروقت مکمل کرنے اور طلبہ کے تعلیمی نقصان کا ازالہ کرنے کے لیے ہفتے میں چھ روز کلاسز کا انعقاد ضروری ہے۔ اس فیصلے کا اطلاق صوبے کے تمام سرکاری اور نجی تعلیمی اداروں پر یکساں طور پر ہوگا۔
نوٹیفکیشن میں مزید کہا گیا ہے کہ تمام اسکول مقررہ اوقات کار کے مطابق اپنی تدریسی سرگرمیاں جاری رکھیں گے اور متعلقہ حکام اس فیصلے پر عمل درآمد کی نگرانی بھی کریں گے۔ محکمہ تعلیم نے والدین، اساتذہ اور تعلیمی اداروں سے تعاون کی اپیل کرتے ہوئے کہا ہے کہ طلبہ کی باقاعدہ حاضری یقینی بنائی جائے تاکہ تعلیمی عمل بغیر کسی رکاوٹ کے جاری رہ سکے۔