غصہ دل کی بیماریوں کے خطرات میں اضافے کا باعث قرار

نیویارک: نئی تحقیق میں انکشاف ہوا ہے کہ جب کوئی شخص غصے کی حالت میں ہوتا ہے تو اس میں دل کی بیماریوں کا خطرہ کافی بڑھ جاتا ہے۔
میڈیا رپورٹس کے مطابق ایک حالیہ مطالعے میں محققین نے پایا کہ غصہ خون کی شریانوں کو غیر صحت مندانہ طریقے سے سکیڑ دیتا ہے اور اس سے دل کی بیماری کے خدشات بڑھ جاتے ہیں۔
مطالعے کے مصنف اور کولمبیا یونیورسٹی کے ماہر امراض قلب، ڈاکٹر ڈائیچی شیمبو کا کہنا تھا کہ اگر آپ ایک ایسے شخص ہیں جو ہر وقت غصے میں رہتے ہیں، تو آپ کو آپ کی خون کی نالیوں پر دائمی زخم ہورہے ہیں۔
ڈاکٹر ڈائیچی اور ان کی ٹیم نے اپنے مطالعے میں خون کی نالیوں کی سرگرمی کا جائزہ لیا، جب شرکا غصے کی حالت میں تھے۔ غصے کی حالت کا اضطراب، اداسی اور نارمل جذبات کی حالتوں سے موازنہ کیا گیا۔
محققین نے پایا کہ غصے کی حالت خون کی نالیوں کی کمزوری کا باعث بنتی ہے۔ یہ اثرات غصے کے خاتمے کے بعد 40 منٹ تک قائم رہتے ہیں۔