کراچی: محکمہ تعلیم نے فیس ادا نہ کرنے پر انتظامیہ کی جانب سے طالبہ کے والد کو تشدد کا نشانہ بنانے پر اسکول کی رجسٹریشن معطل کردی۔
نجی اسکول میں بچوں کو حبس بے جا میں رکھنے اور والدین پر تشدد کے حوالے سے تحقیقاتی ٹیم نے رپورٹ محکمہ تعلیم کو جمع کروادی۔
رپورٹ میں کہا گیا کہ والدین کی تمام شکایات درست ثابت ہوئیں، نجی اسکول فیس کی تاخیر پر بچوں کو حبس بے جا میں رکھتا ہے، انتظامیہ نے بچوں کے والد سے بھی بدسلوکی کی، اسکول مالکان کمیٹی کے طلب کرنے پر بھی حاضر نہیں ہوئے، انتظامیہ نے سی سی ٹی وی فوٹیجز بھی فراہم نہیں کیں، اسکول انتظامیہ فیس بذریعہ بینک نہیں بلکہ کیش وصول کرتی ہے۔
تحقیقاتی ٹیم نے رپورٹ وزیر تعلیم کو ارسال کرتے ہوئے کہا کہ قواعد کے مطابق اسکول کی رجسٹریشن معطل کی جائے۔ محکمہ تعلیم نے وزیر تعلیم کی ہدایت پر نجی اسکول کی رجسٹریشن معطل کردی۔
واضح رہے کہ گزشتہ روز کراچی کے ایک نجی اسکول کی انتظامیہ کی جانب سے فیس کی عدم ادائیگی پر بچی کے والد کو تشدد کا نشانہ بنانے کا واقعہ منظرعام پر آیا تھا، جس پر اس اسکول کے خلاف یہ کارروائی کی گئی ہے۔