میرے کافی تعلقات، برطانوی حکومت نے فائیواسٹار ہوٹل میں رہائش دی، حریم شاہ

لندن: پاکستانی ٹک ٹاکر حریم شاہ کا کہنا ہے کہ حال ہی میں اُنہیں برطانوی حکومت کی جانب سے فائیواسٹار ہوٹل میں رہائش دی گئی ہے۔
حریم شاہ نے اپنے حالیہ انٹرویو میں کہا کہ برطانیہ میں رہائش سب سے مہنگی ہے، لیکن میں اس معاملے میں بہت خوش قسمت ہوں کیونکہ مجھے میرے ایک بہت ہی اچھے دوست نے لندن میں ایک خوبصورت فرنشڈ اپارٹمنٹ گفٹ کیا ہے اور میں اُسی اپارٹمنٹ میں رہائش پذیر ہوں۔
انہوں نے کہا کہ اس کے علاوہ، میرے ساتھ پیش آنے والے حالیہ واقعے (دھمکیاں اور بلیک میلنگ) کے بعد برطانوی حکومت نے مجھے فائیو اسٹار ہوٹل میں رہائش دی ہے، اسی وجہ سے یہاں میرا کسی بھی چیز کا کوئی خرچہ نہیں۔
اُنہوں نے کہا کہ بہت لوگ مجھ سے محبت کرتے ہیں، وہ اپنی محبت میں مہنگے مہنگے تحائف بھی دیتے ہیں لہٰذا میرے لیے لندن میں رہنا مشکل نہیں، یہاں میرے کافی تعلقات ہیں۔
حریم شاہ نے کہا کہ لوگ لندن میں رہائش کے لیے ترستے ہیں اور یہاں لوگوں کو اپنا گھر بنانے میں کئی سال لگ جاتے ہیں، لیکن مجھے یہاں گفٹ میں تیار شدہ اپارٹمنٹ مل گیا۔
انہوں نے مزید کہا کہ میں پیدائشی طور پر ہی خوش قسمت ہوں، پاکستانی میں بھی کروڑوں لوگ گوگل پر مجھے سرچ کرتے ہیں، اللہ تعالیٰ نے مجھے بہت شہرت سے نوازا ہے۔
خیال رہے کہ حال ہی میں حریم شاہ کو دھمکیاں موصول ہوئی تھیں، جس کے بعد لندن پولیس اسکاٹ لینڈ یارڈ کی جانب سے ٹک ٹاکر کو تحفظ فراہم کیا گیا۔
برطانوی پاکستانیوں کے ایک گروپ کی جانب سے دعویٰ کیا گیا تھا کہ حریم شاہ نے مانچسٹر میں 6 ہزار پونڈ چوری کیے اور وہ لندن فرار ہوگئیں۔