بیٹی کی شادی سے چند دن پہلے ماں ہونیوالے داماد کے ساتھ فرار

علی گڑھ: بیٹی کی شادی سے چند روز قبل خاتون اپنے ہونے والے داماد کے ساتھ فرار ہوگئی۔
بھارتی میڈیا رپورٹ کے مطابق ریاست اترپردیش کے شہر علی گڑھ میں پیش آیا، جہاں بیٹی کی شادی سے چند روز قبل اس کی ماں اپنے ہونے والے داماد کے ساتھ3 لاکھ روپے نقد اور 5 لاکھ کے زیورات لے کر رفوچکر ہوگئی۔
پولیس کے مطابق لڑکی کے والد جتندر کمار کی جانب سے درج کروائی گئی ایف آئی آر میں بتایا گیا کہ اس کی بیوی اور بیٹی کا ہونے والا شوہر دونوں ہی لاپتا ہیں، جب کہ ساڑھے 3 لاکھ روپے کی نقد رقم اور سونے چاندی کے زیورات بھی غائب ہیں جن کی مالیت قریباً 5 لاکھ بھارتی روپے بنتی ہے۔
لڑکی کے والد کے مطابق ان کی بیٹی کی شادی 16 اپریل کو طے تھی، جس کے لیے شادی کے کارڈز بھی تقسیم ہوچکے تھے اور تمام تیاریاں زورو شور سے جاری تھیں، تاہم داماد بیٹی سے شاذونادر ہی بات کرتا تھا، اس کے برعکس وہ روزانہ قریباً 20-22 گھنٹے لڑکی کی ماں سے بات کرتا تھا۔
لڑکی کے والد کا بتانا ہے کہ وہ کام کے سلسلے میں بنگلورو میں رہائش پذیر ہیں اور حال ہی میں گاؤں واپس آئے ہیں، واپسی پر جب ہونے والے داماد اور بیوی کی قربت دیکھی تو شک میں مبتلا ہوا، داماد نے بھاگنے سے قبل ان سے کہا تھا تم نے اپنی بیوی کو 20 سال تک پریشان کیا، اب اسے جینے دو اور بھول جاؤ۔
دوسری جانب شیوانی نامی لڑکی نے والدہ سے نفرت کا اظہار کرتے ہوئے پولیس کو بتایا کہ اس کی ماں زیورات اور پیسے لے کر بھاگ گئی، اس نے سب کچھ ویسا ہی کیا جیسا کہ اس آدمی نے اسے کہا۔
لڑکی نے مطالبہ کیا کہ ہمیں زیورات اور نقدی واپس دلوائی جائے، اس کے بعد چاہے وہ زندہ رہیں یا مر جائیں، ہمیں کوئی فرق نہیں پڑتا۔