نوجوانوں میں ویپس کا استعمال ذہنی صحت کیلئے سنگین خطرہ قرار

کراچی: نئی تحقیق کے مطابق وہ نوجوان جو ویپس استعمال کرتے یا سگریٹ نوشی کرتے ہیں، ان کو ڈپریشن اور بے چینی کی شکایت کے خدشات زیادہ ہوتے ہیں۔
ماضی میں کیے جانے والے مطالعوں میں تمباکو کا خراب ہوتی ذہنی صحت کے ساتھ تعلق سامنے آچکا ہے لیکن نوجوانوں میں ویپس کے استعمال و سگریٹ نوشی اور ذہنی صحت کے درمیان تعلق جاننے کے لیے کافی تحقیق نہیں کی گئیں۔
ویسٹ ورجینیا یونیورسٹی سے تعلق رکھنے والے تحقیق کے مصنفین نے بتایا کہ اس تعلق کا جاننا اس لیے اہم ہے کہ نوجوان اس وقت نشوونما کے اہم مرحلے میں ہوتے ہیں جب صحت کے لیے خطرہ رکھنے والی عادات شروع ہوتی ہیں۔
جرنل پی ایل او ایس مینٹل ہیلتھ میں شائع شدہ تحقیق میں محققین نے 2021 سے 2023 کے درمیان ہونے والے نیشنل یوتھ ٹوبیکو سروے سے مختلف ڈیموگرافکس میں تمباکو کے استعمال، ڈپریشن اور بے چینی کی علامات کے حوالے سے ڈیٹا استعمال کیا۔
سروے میں 60 ہزار 72 مڈل اسکول اور ہائی اسکول کے طلبا شریک ہوئے۔ 21.31 فیصد طلبا نے تمباکو کی مصنوعات کے استعمال، 9.94 فیصد نے برقی سگریٹ کے استعمال کے متعلق بتایا۔ صرف 3.61 فیصد نے سگریٹ، سگار، حقہ اور پائپ جیسی تمباکو کی روایتی مصنوعات کے استعمال جب کہ 7.80 فیصد نے ای سگریٹ اور روایتی مصنوعات کے استعمال سے متعلق بتایا۔
مجموعی طور پر سروے میں 25.21 فیصد طلبا نے ڈپریشن جب کہ 29.55 فیصد طلبا نے بے چینی کی علامات کے متعلق بتایا۔