لندن: پاکستانی نژاد برطانوی گلوکار زین ملک کا کہنا ہے کہ وہ بولی وُڈ کنگ شاہ رخ خان کو فلموں میں دیکھ کر مغرور انسان سمجھتے تھے۔
گلوکار نے اپنے ایک انٹرویو میں شاہ رخ خان کے حوالے سے گفتگو کرتے ہوئے کہا کہ ’میں ذاتی طور پر شاہ رخ خان کا اُس وقت تک کوئی بڑا مداح نہیں تھا جب تک میں ان سے نہیں ملا تھا۔‘
زین ملک نے کہا کہ شاہ رخ خان سے ملنے کے بعد مجھے احساس ہوا کہ وہ کتنے عاجز انسان ہیں، واقعی میں اُن کا ایک مختلف رُوپ دیکھنے کو ملا، کیونکہ وہ فلموں میں ہمیشہ تھوڑا سا مغرور نظر آتے تھے۔
اُنہوں نے کہا کہ میں جب حقیقت میں شاہ رخ خان سے ملا تو مجھے وہ بہت زیادہ اچھے لگے اور ایک ملاقات نے اُن کے بارے میں میری رائے تبدیل کردی۔
زین نے یہ بھی کہا کہ اگر آپ کو کبھی اچھی بولی وُڈ فلم دیکھنے کا موقع ملے تو دیوداس دیکھیں کیونکہ اس فلم میں شاہ رخ خان ہیں۔
خیال رہے کہ شاہ رخ خان اور زین ملک کے درمیان اُس وقت ملاقات ہوئی تھی، جب دونوں لندن میں ایشین ایوارڈز میں شریک ہوئے تھے۔