زرنش نے ماضی کے بیان پر معافی مانگ لی، علیزے کا معاف کرنے سے انکار

کراچی: سابقہ اداکارہ زرنش خان نے علیزے شاہ سے معافی مانگی، جسے اداکارہ نے منظور کرنے سے انکار کردیا۔
اسلام کی خاطر شوبز سے کنارہ کشی اختیار کرنے والی زرنش خان نے ماضی میں وجاہت رؤف کے پروگرام میں علیزے شاہ کو بدتمیز قرار دیا اور کہا تھا کہ بدتمیزی میں ان سے کسی کا بھی مقابلہ ہو تو وہ ہی جیتیں گی تاہم اب زرنش خان نے ماضی میں علیزے سے متعلق دیے گئے بیان پر معافی طلب کی ہے۔
زرنش نے علیزے کو پیغام بھیجا جس میں انہوں نے اپنی غلطی کو مانتے ہوئے معافی مانگی، جس پر علیزے شاہ نے بتایا کہ زرنش کی جب یہ ویڈیو وائرل ہوئی (جس میں علیزے کو بدتمیز کہا گیا)، اس کے بعد علیزے کی والدہ نے سابقہ اداکارہ کو فون کیا اور یہ سب کہنے کی وجہ پوچھی۔
علیزے نے بتایا کہ زرنش نے میری والدہ کو کہا کہ وہ ویڈیو بنائیں گی اور ساری بات بتائیں گی لیکن اس کے بعد علیزے کی والدہ کا نمبر بلاک کردیا گیا۔
علیزے شاہ نے اپنی اسٹوری میں لکھا، میں آپ کو معاف نہیں کرسکتی، نہیں بھول سکتی کہ میری والدہ اس وقت اپنے آپ کو کتنا بے بس محسوس کررہی تھیں، میری والدہ کی آواز کانپ رہی تھی لیکن آپ نے ان کا نمبر بلاک کردیا، تاکہ وہ آپ کو دوبارہ معافی کا نہ کہیں؟
علیزے نے کہا کہ میں نے آج تک کسی کے خلاف آن لائن بات نہیں کی، میں صرف اپنی امی سے شکایت کرتی ہوں اور وہ اللہ سے۔
علیزے نے یہ بھی کہا کہ میری ماں جب مجھے اپنے ہاتھ سے کھانا کھلاتی تھیں تو وہ آپ کو بھی نوالے بناکر کھلایا کرتی تھیں، اللہ سب دیکھ رہا ہے۔