اے آئی کے حامل اسمارٹ چشمے کب مارکیٹ میں دستیاب ہوں گے؟

نیویارک: آرٹیفیشل انٹیلی جنس کے حامل اسمارٹ چشمے مارکیٹ میں آنے کو تیار ہیں۔
انہیں پہننے والا سامنے سے آنے والے شخص کو ناصرف پہچان سکے گا، بلکہ اس کا پورا پروفائل چشم زدن میں اس کے سامنے آئے گا۔
تاہم ڈومیسٹک وائلنس اور انسداد ہراسانی پر کام کرنے والے اداروں کا کہنا ہے کہ ان چشموں سے خواتین اور لڑکیوں کو ہراسانی یا بدسلوکی کے سامنے کا خدشہ بڑھ سکتا ہے۔
امریکی اخبار نیویارک ٹائمز کی رپورٹ کے مطابق میٹا، ممکنہ طور پر اسی سال اپنے میٹا گلاسز میں فیشل ریکگنیشن ٹیکنالوجی شامل کرنے پر غور کررہا ہے۔ یہ ٹول ابھی تیاری کے مراحل میں ہے اور اس میں ممکنہ طور پر ٹیگنگ ہوسکے گی، جس کے ذریعے ہر اس چہرے کی شناخت ہوسکے گی جو کسی بھی میٹا پلیٹ فارم سے منسلک ہو یا اس کا عوامی پروفائل فیس بک یا انسٹاگرام پر موجود ہو۔
ان فلاحی اداروں کا کہنا ہے کہ فیشل ریکگنیشن والے اسمارٹ چشموں کے استعمال سے خواتین اور لڑکیوں کو ہراسانی اور بدسلوکی کے خطرات کا سامنا کرنا پڑسکتا ہے، کیونکہ اس سے بدسلوکی کرنے والوں کو انہیں تلاش کرنے اور ان کا پیچھا کرنے میں مدد مل سکتی ہے۔
بدسلوکی کے عادی افراد اس کے ذریعے بغیر رضامندی کسی کی شناخت سے متعلق معلومات تک رسائی حاصل کرسکیں گے۔
میٹا کے ترجمان کا کہنا ہے کہ کمپنی اس فیچر کے حوالے سے ابھی مختلف آپشنز پر غور کررہی ہے اور کسی بھی اقدام سے پہلے محتاط اور سوچ سمجھ کر فیصلہ کرے گی۔