امریکا، اسرائیل کی ایران کیساتھ جنگ: دبئی کی سیاحت پر منفی اثرات

دبئی: مشرق وسطیٰ میں جاری جنگ خطے کی سیاحت پر گہرا اثر ڈال رہی ہے، دبئی کی سیاحت کا شعبہ سب سے زیادہ متاثر نظر آتا ہے، جنگ طویل ہونے سے امسال سیاحوں کی تعداد میں بے پناہ کمی کا اندیشہ ہے۔
منسوخ شدہ پروازوں، ملتوی سفر اور غیر ملکی مسافروں میں بے یقینی صورت حال پیدا ہوگئی ہے۔
دنیا بھر کے ٹور آپریٹرز اپنے کلائنٹس کے لیے حل تلاش کرنے میں مصروف ہیں، خاص طور پر وہ لوگ جو دبئی میں پھنسے ہوئے ہیں یا جن کا سفر منسوخ ہوگیا۔ جنگ کا اثر صرف موجودہ مسافروں پر نہیں بلکہ ان پر بھی پڑ رہا ہے جو دنیا کے دیگر حصوں کا سفر کرچکے ہیں، کیونکہ خلیجی خطے میں کئی بڑے ہوابازی مراکز خاص طور پر دبئی اہم ہے۔ جرمن ٹور آپریٹرز نے اعلان کیا ہے کہ وہ مشرق وسطیٰ میں پھنسے کلائنٹس کے اضافی اخراجات برداشت کریں گے اور کم از کم 7 مارچ تک متحدہ عرب امارات اور عمان کے دورے منسوخ کر دیے ہیں۔ برطانوی ٹریول انڈسٹری ایسوسی ایشن (ABTA) نے بھی کہا کہ ایجنسیاں اس وقت تک خطے میں صارفین نہیں بھیجیں گی جب تک برطانوی فارن آفس غیر ضروری سفر سے منع کرتا ہے۔
معاشی اثرات بھی سنگین ہیں۔ اقوام متحدہ کی سیاحت کے مطابق، 2025 میں تقریباً 100 ملین سیاح مشرق وسطیٰ کا دورہ کرچکے تھے، جو عالمی بین الاقوامی سیاحوں کا تقریباً 7 فیصد بنتا ہے۔ تجزیہ کار آکسفورڈ اکنامکس کے مطابق، جنگ کی وجہ سے 2026 میں مشرق وسطیٰ آنے والے سیاحوں کی تعداد 11 سے 27 فیصد کم ہو سکتی ہے، جبکہ پچھلے تخمینے کے مطابق 13 فیصد اضافہ متوقع تھا۔ اس کا مطلب ہے کہ پچھلے منظرنامے کے مقابلے میں 23 سے 38 ملین بین الاقوامی زائرین کم آئیں گے اور سیاحتی اخراجات میں 34 سے 56 ارب ڈالر کا نقصان ہوسکتا ہے۔ اس کے سب سے زیادہ منفی اثرات دبئی پر پڑیں گے۔