واشنگٹن: امریکا کے محکمۂ خارجہ نے کالعدم بلوچستان لبریشن آرمی (بی ایل اے) اور اس کے ذیلی گروپ مجید بریگیڈ کو غیر ملکی دہشت گرد تنظیم قرار دے دیا۔
امریکی وزیر خارجہ مارکو روبیو کا کہنا ہے کہ دہشت گرد تنظیموں کی نامزدگیاں دہشت گردی کے خلاف ہماری لڑائی میں اہم کردار ادا کرتی ہے، ٹرمپ انتظامیہ کا دہشت گردی کی روک تھام کے لیے عزم برقرار ہے۔
امریکی محکمۂ خارجہ کی جانب سے جاری کردہ بیان میں کہا گیا کہ بی ایل اے اور مجید بریگیڈ کو دہشت گردوں کی فہرست میں شامل کردیا گیا ہے۔
اعلامیہ میں کہا گیا کہ 2019 میں کالعدم بی ایل اے کو خصوصی طور پر نامزد عالمی دہشت گرد قرار دیا گیا تھا جب کہ مجید بریگیڈ کا نام بی ایل اے کے عالمی دہشت گرد فہرست میں شامل ہے۔
اعلامیے کے مطابق بی ایل اے نے 2024 میں کراچی ایئرپورٹ اور گوادر میں خودکُش حملوں کی ذمے داری قبول کی تھی جب کہ 2025 میں بی ایل اے نے جعفر ایکسپریس ہائی جیکنگ کی ذمے داری قبول کی تھی۔